الشاعر الحسيني حسن تويج النجفي

قصيدة عن
العقيله زينب تخاطب ابو الفضل العباس((عليهما السلام))



زينب تنادي بدمع وحزينه ----- كوم وانهض لينه ليش ياراعي الابه
هالحرم متسلبه ----- كوم وانهض لينه
أنه اختك كوم موخدري أنهتك
ماأظن ترضاهه خويه مروتك
اليوم يومك مو وكتهه لنومتك
شوصتك أمك يخويه بينه
شوف العلينه شسده
وشعمل بينه العده ----- كوم وانهض لينه
هالكلب ضامي يخويه لغيرتك
يرتوي بس لو شرب من خوتك
ماحسبت حساب والله لوكعتك
لاحسبت تروح وتخلينه
هالحرم يتصارخن
وين كافل هالضعن ----- كوم وانهض لينه
هاك أخذ جفي يبوفاضل وكوم
واحمي ضعنك كامت عدانه تحوم
بثار بدر تريد غايتهه وتروم
حصلت غايتهه ياراعينه
اتنومس علينه الشمر
من طحت طاح الخدر----- كوم وانهض لينه
هاك أخذ عيني يبو فاضل وشوف
منظر الخيل بخيمنه من تطوف
نار واصوات العده ولمة سيوف
حاطت مخيمنه ياوالينه
ننطي لاوين الوجي
ياكفيلي شنرتجي ----- كوم وانهض لينه
حركوا علينه يعباس الخيم
روعوا كلب اليتامه والحرم
والعزيزالجان بحماك أنهضم
خويه والله بفكدك نذلينه
من رحت يابو الفضل
ترضه يرعانه النذل ----- كوم وأنهض لينه
عالهزل سرنه يخويه بلاخدر
والضعن عكبك صفه بيد الشمر
موتشوف الصار كلي شتنتظر
جم طفل من صاح عمي وينه
جاوبتهم بالبجي
مات بشفافي الحجي ----- كوم وانهض لينه
هالمشاهدعالقه ماتنسه
بس يتامه والعليل وهالنسه
خيم علينه يعباس الاسه
ليل موحش هاليمر علينه
لاكفيل ولاولي
من يباري محملي ----- كوم وانهض لينه
خويه بيتي من طحت والله نهدم
بس دمه عيني تهل من الالم
والكلب جالعين مصيوب بسهم
ينزف دموم والم جفينه
شاغت الروح وصحت
مووكتهه من طحت ----- كوم وانهض لينه

قصيده يا اخي موثره جدا لسيدتي ومولاتي بطلة كربلاء
كلمات جدا اثرت فيني
عظم الله لكم الاجر يا موالين
كل الشكر اخي

شكرا للمرور خيتي

وماجوره

شكرا للمرور وماااجورين

شاكر مروركم عزتي
وماجوره