عام كامل مر علينا وإنتهينا من ثاني عام
جنت أهفيلج بإيديه وبطلت عيني تنام
للأسف تالي إكتشفتج أنتي مو مال إحترام



كنت أجيج وكلي لهفه وأغفى يمج للصبح
ما دريت بذنبي بيج تالي يالسوده أنذبح
غفل بقتي أغلى حاجه بروح ابد ماتنمسح
عفيه انا شقد صلب تحملت هيجي جرح
ولج ليش ماغزر بعينج كل شي له زاد وملح
قاع وبإيدي شتلتج وزرعي ماخضر حرام
هوايه إحجولي عليج وما أصدق بالكلام
للأسف تالي إكتشفتج أنتي مو مال إحترام



غسلت منج ايديه وبدلت كل الهدوم
جروحج توقعني ممكن ..أنفض جروحي وأقوم
أنتي غلطه بعمري هذا وماخليها تدوم
روحي كانت مثل طير فوق دارج بس تحوم
وأنتي تدرين انتي بيه بيج افطر وبيج اصوم
جنتي بيضه وصرتي سوده وجنتي كومه من الهموم
ومن غدرتيني وعرفتج قريت عالحب السلام
وللأسف تالي اكتشفتج والله مو مال احترام



حركت بايدي ضميرج والف ياحيف انهزم
الندم ممكن يلغي غلطه ومايفيدج اي ندم
مسحت اسمج من حياتي وكسرت بيدي القلم
انتي دنيا من الخيانه دنيا مليانه ألم
دربج اللي كله مهانه من عدم كلج عدم
جرح كل شي يطيب .. اغلى شي بيج انسلم
وللك افتح عيونك يا(؟؟؟؟) واصحى من هذا المنام
للاسف تالي اكتشفتج أنتي مو مال احترام



ماندمان تركتج وأنا ماندمان يااخر جرح طاب وترك نيشان
عشقتي فلان ورديتي وعشقتي فلان والنوبه عشقتي فلان
والنوبه عشقتي فلان والنوبه عشقتي فلان ابن فلان
هذوله كلهم اعرفهم وبعد مادري بعد عندج جم فلان
بعد منين يدخل حبج لقلبي وانا قلبي انبنت فوقه سبع حيطان
بعد يا ثوب يرهملج وتتغطين وانتي مكشفه وقلبج غدرني وخان
غفل بقتيني اخذتي قليبي من صدري وانا مايل شفتج جنت بيج سكران
انا اللي منج اخذته انتي اللي تدرين يسوى الذهب والالماس والتيجان



عام كامل مر علينا وإنتهينا من ثاني عام
كنت أهفيلج بإيديه وبطلت عيني تنام
للأسف تالي إكتشفتج أنتي مو مال إحترام





((مع أحترامي للجمـــيــــع))

ماتسوه العتب واتعاتب وياك
وحرام اخسر حجي واتعب واحاجيك
ما تقبل يمنتي تكض يمناك
ولا رجليه تقبل حته اماشيك
مثل العيد عندي جان ملكاك
بس كلشي اختلف هسه من الاكيك



---------------------------

الله يا بوحسين على هاذي القصيده بلنسبه اليه اسميه قاسيه

ماعاش الي يمس هاذا القلب الطيب

قصيده خضير هادي هاذي جدااا

مؤلمه وربي يبعد عنك هيج امور

تحياتي من القلب لك

منورتني يا لحوونه ية هلا بيج

وشكرا للمرور