درميااات العراب

شوصف بيك ياحبيبي وانا المحتار
حرت ما اعرف يغالي شلون اغنيلك

ولا اعرف شلون اكتب عليك اشعار
ولا تعرف ابياتي شلون تبديلك

اذا انت ورد منك فلا موجود
ورود الكون كلها بخجل تحنيلك

يالشايل رموش جنها كوم اسهام
تكتل كل شخص والناس تربيلك

ويالعندك عيون مكحلة من الله
شفت حتى الليالي مكحله بليلك

يالشعرك بحيرة بنص ظلام الليل
يصب شلال نازل يزهي حاليلك

ويا لوجهك بدر مو بالسما بالكاع
ضوي على الفضاء ونجومه تحييلك

يا لحسنك خيال يسكت اليحجون
ومن حسنك حبيبي الشمس تشكيلك

يالشايل جمال ينطق الخرسان
وحتى اطفال المهد كامت تناغيلك

ترف ما تحمل حنانك بينا حتى الام
ولا يحمل صفاتك بالحسن جيلك

شفتك مرة تمشي والبشر تبعوك
وكل الناس صاحت ربنا دخيلك

لان انت ورد ويه العسل مخبوط
وعطور الارض كلها معطره بهيلك

ولان صوتك يغالي يخجل الالحان
تدوخ جبال من تسمع مواويلك

انت اية حسن من الله عالانسان
وبشوفة جمالك كل الناس تدعيلك

فدوة اني الك شنهو الحلاة البيك
عمر بيته الهي ومن عمر بيبتك

هي الكاع تعبت ما تشيلك حيل
عمت عيني عليك شلون ما شيلك

تولع بيك كلبي من الصغر يهواي
واجاك الحين كلبي يريد يشكيلك

انا بهجرك حبيبي تعذبت والله
خذت روحي مني وعيني تبجيلك

تبجيلك جمر ودموعي هم تسيل
مني وما نشف دمعي بمناديلك

لتعوف اليجبك يحترك وسط الشوك
تعال اطفيلي شوكي واني اطفيلك

انت الروح بية والنفس والعين
اذن تعنيلي عمر واني شعنيلك

اعنيلك فرح لو بس حزن ولام
لو قطرة مطر نزلت على نيلك

تدريني متت ياعمري من جفاك
وترد الروح من توصل مراسيلك

بقيت بغربيلي انت وصفت كل الناس
واني اول شخص صفاني غربيلك

ادري اني بحياتك مالي أي شي
وتدري انت بحياتي دولة بانيلك

يا صوت المحبة ويا نغم فيروز
الك عمري وحياتي واني كلي لك

يا نبض كلبي وكل سواد العين
اخذ روحي الك شمعه تضويلك

ومن تنام وحدك لا ابد لتخاف
اعرف اني يمك ابقى صاحيلك

ومن تهتم يغالي وما يجيك النوم
تجيك جروحي كلها تظل تلوليلك

ومن تبرد حبيبي وماكو يمك نار
اكص ضلوعي واشعل حتى ادفيلك

ومن تجوع انت واني احس بيك
اكص لحمات من كلببي وانا اشويلك

واذا تمرض بيوموما يفيدادواك
احط عمرك على عمرك حتى اشد حيلك

ومن تحس تعب جدامك الحلوات
تفز اجدامي مني بدوني تمشيلك

ومن يلفه امتحانك يا بعد هالروح
اظل الليل كله صاحي ادعيلك

ومن ما تلكه حنة وتزعل انت هواي
الك موجود دمي بيه احنيلك

ومن تريد شغلة وما تفض وياك
افز اني بحناني وطيبتي اسعيلك

ومن ترجع لبيتك ولطريق بعيد
كل اية حفظ موجودة اقريلك

ومن تضوج انت وتخنكك العبرات
احن واجمل قصايد مني اوديلك

ومن تنسى حبيبي ليلة الميلاد
اكون اول شخص بالدنيا اهنيلك

ادعيلك بدعوة الما دعاها انسان
وادز كلبي وعيوني وروحي اهديلك

لان انت حبيبي وما ابدلك دوم
ولان انت امنياتي وابقى وافي لك

يا حنة الفرح والياس والاعياد
ادب رقة وجمال الله المخليلك

يا اجمل حبيب يعذب المحبوب
بعد شحجي يغالي كلي شقريلك

واذا متريد انت اعذرني عالتقصير
بس كلي بعد شتريد اسويلك

اذا انت الورود اتغزلت بيك
وتغزل بيك كل مخلوق واعيلك

اذن مو مهم تعرف شكد اهوااك
اخذ كلبي واساله وهو يحجيلك

يل بية غدرت وما وفيت وياي
يا ويلك حبيبي من الله يا ويلك

خذني يمك
بعد ما ظل كل عذر لا تعتذر
ليل عمري وعمرك مخلص بعد مابيه صبر
خل نلم احلامنا ونحفظ صورهن
كبل لا ياخذهن بدربه الفجر
خل نلم الباقيات اسنيني واسنينك نسويهن عمر
وهنه ما يكفن عمر
ونبدي من جده وجديد بواهس اسنين الصغر

صراحه يا عراب انك شاعر وكلامك كبير حيل تسلم ايدك يا طيب

احب الكلام العراقي كثير معني فيه بعض الكلمات لا افهمه ولاكن فهمت القصيده

مشكوره اخي الكريم

اشكركم اعزائي على مروركم

يا اجمل حبيب يعذب المحبوب
بعد شحجي يغالي كلي شقريلك

واذا متريد انت اعذرني عالتقصير
بس كلي بعد شتريد اسويلك

اذا انت الورود اتغزلت بيك
وتغزل بيك كل مخلوق واعيلك

اذن مو مهم تعرف شكد اهوااك
اخذ كلبي واساله وهو يحجيلك

شكرا الك العراب كلام جميل

كلام جميل جدا بورتكم

كلام جميل واحساس روعه قمه الجمال