حصانه من حشوشتي

قبل شكم يوم
واني كاعد ابحوش بخشمي قصدي بالفيس شسمه
ما اسمعلك اللا حشوشتي تصيح يبووووووووووووووووو حشوش الحكلي وبسرعة البرق جتي من المطبخ تركض باتجاه الهول حتى الكاشي مال الممر تشلع من سرعتهه
جتني لونهه اصفر وترجف من الخوف
بحيث كمت افرك بعيوني ممصدك عبالي دا احلم
يعني ممعقوله حشوشتي مصوفرة من الخوف شغله ميعقلهه دماغي
كلتلهه شبيج يمعوده
كلتلي جري جري جري
شنو يمعوده
جري جري جري
شنو
جريدي بالمطبخ
عاد اني سبع السبمبع سحبت الماسحه واتجهت للمطبخ دا اواجه الجريدي
وحشوشتي صعدت فوك القنفة بالهول تنتظر نتائج المواجهه المصيريه بيني وبين الجريدي
اتجهت للمطبخ ولكيت الجريدي خاتل وره الثلاجه
وبدل ما اضربه كتله روح افلت
هو استغرب من قراري هذا
كتله لتستغرب اني راح اهدك لأن كدرت تخوف حشوشتي وفرحت كلبي
هو عاد شكرني وفلت
رجعت على حشوشتي وكلتلهه ملكيته يجوز فلت من شافج تركضين
ورجعت حشوشتي للمطبخ توصخ المواعين حتى اغسلهن
ثاني يوم العينتين هم طلعلهه وجتني تكمز
عاد اني متحملت من شفتهه تكمز وظليت اضحك عليهه
ويا فرحه ما تمت
شو تحول خوفهه الى غضب ساطع ولونهه انكلب من الى الاحمر من الغضب تكول طماطايه واستوت
عاد هي كلتلي لو انته لو الجريدي بالبيت
واحد من عدكم يبات بالبيت وانته بكيفك تريد تنام هنا لو بالحديقة
عاد اني صعدت الحمية عندي ورحت انبش عالجريدي حتى انيمه بالحديقة لأن الجو بارد وما الي خلك انام بالحديقه بهذا الجو
الجريدي ختل ومكدرت الكا عبالك حس شريد اسوي بي
حشوشتي كلتلي اليوم راح انطيك طرح عود من باجر امشي القرار وقرارهه هذا مو حبا بيه بس تخاف ليطلعلهه الجريدي بالليل عاد اني استغليت الموقف وتشجعت وكدرت اكللهه
اذا تخلصت من الجريدي شراح احصل
وركضت للمطبخ وره محجيت الحجايه كلت كل شي يصير وحشوشتي تخاف تجي للمطبخ
عاد حشوشتي كلتلي راح انطيك مهله يومين حتى تصيده للجريدي واذا صدته راح انطيك حصانه متنام بالحديقه لمدة شهر كامل
اني سمعت بيهه حصانه لمدة شهر صدكت عمه طلعت الشمس وطلعت كبل للسنك لأهل المواد الزراعيه وطبيت لأبو المحل وكتله اريد اقوى سم جريديه عندك
عاد ابو المحل انطاني زرنيخ وحلقوم مسموم ولاصق مال جريدية ومصياده حديد
ورجعت للبيت وحطيت زرنيخ للاكل وذبيته للجريدي شو اجه شتمه وعافه وراح على حظي طلع جريدي ابو مصلحه ويعرف بالشغله
كلت خلي اجرب احط اللاصق وحطيت الحلقوم المسموم وكلت اذا ملزك باللصق يموت مسموم بالحلقوم اشو اجه الجريدي يتمشى فوك اللاصق ولا يمه بس لزك التراب اللي جان برجل الجريدي وراح اكل من الحلقوم المسموم وعجبه حيل وكلي انطيني النوبه
اني ضجت كلش من حجايته وحطيتله باقي الحلقوم بالمصياده الحديد وظليت لازم بابهه بيدي وكتله طب اكل
عاد هو ابو نفس الدنيه طب بالمصياده حتى ياكل حلقوم وسديت باب المصياده علي
عاد اني نفشت ريشي ورحت لحشوشتي احمل المصياده بيدي والجريدي محبوس بيهه وسلمتهه ايا وحصلت على الحصانه من نومة الحديقه لمدة شهر كامل
والجريدي حصل حمام مي حار على ايد حشوشتي وصار في خبر كان
وعم الفرح والسرور في ارجاء المنزل

تسلم علاوي على الموضوع حلو هههههههه

ههههههههههه

يسلمو علاوي ,,,

يسلمو علاوي ههههههههههههههه

الــــــــــــــصقر كتب:: تسلم علاوي على الموضوع حلو هههههههه

هلا بيك صقر منور

الصدرية كتب:: ههههههههههه

يسلمو علاوي ,,,

منوره صدريه

وشكرا على المرور

احزان الهجران كتب:: يسلمو علاوي ههههههههههههههه

شكرا على المرور احزان

ههههههههههههه

عز الله عملة ...عاشت ايدك يا مبدع

منور جاك

شكرا للمرور

هههههههه حلوه عاشت الايادي
هههههههههههههههههههههههههه
ههههههههههههههههههههههه